«Թեղենյաց» վանական համալիրը գտնվում է պատմական Նիգ գավառում` ներկայումս Կոտայքի մարզի Բուժական գյուղի հյուսիս-արևելյան կողմում` Թեղենիս լեռան լանջին` թեղիներով շրջապատված բացատում։ Հիմնվել է վաղ միջնադարում։ Առաջին անգամ հիշատակվում է VIII դ. սկզբին` Վահան Գողթնացու վանքում ապաստանելու կապակցությամբ։ Թեղենյաց վանքի Կաթողիկե եկեղեցին (կառուցվել է XII դ.) զույգ որմնամույթերով գմբեթավոր դահլիճ է, որի ճակատները մշակված են «հայկական խորշերով»: 1827 թ-ին Թեղենյաց վանքը հիմնովին ավերվել է երկրաշարժից: